Tvær kynskiptiaðgerðir á Íslandi

Það er Jens Kjartansson, lýtalæknir á Landspítala - háskólasjúkrahúsi, sem framkvæmdi báðar aðgerðirnar fyrir allnokkru síðan. Hann vann á Karolínska sjúkrahúsinu í Stokkhólmi áður en hann hóf störf hér heima. Ytra öðlaðist hann þekkingu á kynskiptiaðgerðum og hefur framkvæmt tvær slíkar á LSH. Hljótt hefur verið um að möguleiki væri á að gangast undir slíkar aðgerðir hér á landi. "Þegar þetta kom upp sóttist landlæknisembættið eftir því að ég gerði þetta hér og það hefur gengið vel, sem betur fer," sagði Jens. "En það er ekki þar með sagt að ég sé að sækjast eftir að gera meira af þessu heldur en orðið er." Jens hefur gert kynskiptiaðgerð á karli annars vegar og konu hins vegar. Hann sagði að komist væri nær raunveruleikanum með því að breyta karlmanni í konu, en að breyta konu í karl. Þessar aðgerðir væru mjög stórar og oft kæmi til smávægilegra lagfæringa eftir þær. "Ekki eru allir sem óska eftir kynskiptiaðgerð til þess bærir," sagði Jens. "Það eru kannski ekki réttar forsendur fyrir hendi til að fólk fari í svona aðgerð. Meginmálið er að reyna að fyrirbyggja það að einhverjir séu að fara í aðgerð, sem ekki þurfa á því að halda. Þar getur verið um að ræða fólk, sem áttar sig ekki á kynferðisstöðu sinni, en heldur að þetta sé vandamálið. En þetta er mjög vel skilgreint vandamál innan geðlæknisfræðinnar, það er fólk sem upplifir sig ekki í réttum líkama, heldur er "transsexual". Þá kvaðst Jens nýlega hafa gert tvær óvenjulegar aðgerðir. Um hefði verið að ræða stúlkur sem í hefði vantað skeiðina, það er leggöngin, en ytri kynfæri hefðu verið til staðar. "Það er mjög sjaldgæft að stúlkur fæðist án þess að hafa skeið, en einhverra hluta vegna hafa tvö tilfelli dottið inn mjög nýlega. Þetta eru fyrstu aðgerðirnar mínar af þessu tagi. Þetta er meðfæddur galli." Önnur stúlkan var með leg, þannig að búa þurfti til skeiðina og tengja legið síðan við hana. Í hinu tilvikinu vantaði legið alveg, þannig að þá voru einungis búin til leggöng.