Nóg komið af bullinu

Stjórn Foreldrafélagsins í Grandaskóla hvetur foreldra til að senda borgarfulltrúum Reykjavíkur bréf í dag þar sem þeim er sagt að axla ábyrgð sína í verkfallinu. Stjórnarmaður félagsins segir að borgarfulltrúum beri skylda til að bregðast við óskum foreldra og hann segir nóg komið af þessu bulli. Stjórn foreldrafélagsins hefur sent út dreifibréf á Netinu þar sem foreldrar eru hvattir til að senda borgarfulltrúunum bréf eftir hádegi í dag. Hún kemur í bréfinu með tillögur að texta, þar sem meðal annars eru setningar á borð við "Borgarfulltrúar eiga að semja við kennara. " - "Þið brjótið á rétti barnanna" - "Hættu þessum heigulshætti!" og "Kæri borgarfulltrúi: Nú finnst mér kominn tími til að þú axlir þína ábyrgð og semjir við kennara. Barnið mitt á rétt á kennslu og þér ber skylda til að veita hana". Vilhelm Steinsen, sem situr í stjórn foreldrafélagsins í Grandaskóla segist líta svo á að kennarar vinni fyrir foreldra og séu starfsmenn borgarinnar og því hljóti það að vera borgarfulltrúa að breyta því sem þarf að breyta. Hann segist gera ráð fyrir að borgarfulltrúar bregðist við, þó að hann átti sig á því að líkurnar á því séu ekkert of miklar. Borgarfultrúar hljóti að átta sig á því að þeim berist að bregðast við þegar foreldrar láta í sér heyra, enda þýði það ekki endalaust að nota launanefndina sem einhvers konar stuðpúða. Verkfallið hefur nú staðið í tæpar fjórar vikur og segir Vilhelm það vera allt of langur tími og með öllu óásættanlegt. Hann segir nóg komið af bullinu, það sé freklega gegnið á rétt barna til að ganga í skóla, með vísunum sem komi málinu ekki við.