Hillary hlýðir á Þresti

Talsvert verður um dýrðir á Grand Hyatt-hótelinu í New York í kvöld þegar Amerísk-skandínavíska stofnunin heldur árlega hátíðarsamkomu sína. Hillary Clinton, þingmaður New York-ríkis, verður meðal gesta ásamt fjölmörgum öðrum áhrifamönnum í bandarísku viðskipta- og stjórnmálalífi sem boðið er til veislunnar. Forseti Íslands verður heiðursgestur en hann hélt utan ásamt eiginkonu sinni fyrr í vikunni. Þjóðhöfðingjar Norðurlandanna fimm eru sérlegir verndarar Amerísk-skandínavísku stofnunarinnar, sem er næstum aldargömul. Forseti Finnlands var heiðursgestur í fyrra og fulltrúar norsku konungsfjölskyldunnar eru væntanlegir að ári. Sérstök áhersla er lögð á Ísland á samkomunni í kvöld og hafa fjölmörg íslensk fyrirtæki staðið að kynningu á sér og sínu í heimsborginni síðustu daga. Er kvöldverðurinn á Grand Hyatt rúsínan í pylsuendanum. Þó að ekki hafi fengist upplýsingar um hvað á borðum verður er víst að pylsur verða þar víðsfjarri enda kostar 500 dali á samkomuna eða 35 þúsund krónur. Allir 400 miðarnir sem í boði voru eru seldir. Samanlagður aðgangseyrir er fjórtán milljónir króna og rennur bróðurpartur fjárhæðarinnar til góðgerðarmála á vegum Amerísk-skandínavísku stofnunarinnar. Auk hefðbundinna ræðuhalda verður dr. Peter Wallenberg, stjórnarformaður Wallenberg-stofnunarinnar, heiðraður sérstaklega. Hann, Clinton, íslensku forsetahjónin og aðrir gestir munu svo njóta söngs Óperukórsins og Karlakórsins Þrastanna úr Hafnarfirði og eru íslenski þjóðsöngurinn og Ísland ögrum skorið á efnisskránni.