Vilja umboðsmann neytenda

"Gera verður neytendavernd hátt undir höfði í samræmi við mikilvægi hennar fyrir almenning og markaðinn. Það verður best gert með því að nýju embætti umboðsmanns neytenda verði falið að fara með neytendavernd," sagði Jóhannes Gunnarsson formaður Neytendasamtakanna í ræðu sinni á þingi Neytendasamtakanna í gær. Hagen Jörgensen umboðsmaður neytenda í Danmörku flutti einnig erindi á þinginu og rakti mikilvægi slíks embættis, en stofnun þess hér á landi hefur lengi verið baráttumál Neytendasamtakanna. "Undir umboðsmann myndu falla ákvæði núverandi samkeppnislaga um óréttmæta viðskiptahætti, auk nokkurra annarra ákvæða laganna," sagði Jóhannes. "Einnig myndi umboðsmaðurinn sinna eftirliti með ýmsum sérlögum á sviði neytendaverndar. Þá er eðlilegt að eftirlit með öryggi neysluvöru og markaðseftirlit verði flutt frá Löggildingarstofu til umboðsmanns neytenda." Þingið var vel sótt.