Ástæðulausar áhyggjur

"Erlent vinnuafl sem kemur til sérhæfðra starfa við Kárahnjúka truflar íslenskt atvinnuumhverfi ekki neitt að mínu mati. Það er ástæðulaust að hafa áhyggjur af því," sagði Friðrik Sophusson, forstjóri Landsvirkjunar, á ársfundi Vinnumálastofnunar í gær, en þar flutti Friðrik erindi undir yfirskriftinni "Stórframkvæmdir og vinnumarkaðurinn". Á fundinum kom fram gagnrýni á það hversu fáir Íslendingar störfuðu við virkjunarframkvæmdir á Kárahnjúkum. Fram kom í máli Friðriks að þegar eftir að samningar höfðu náðst við ítalska verktakafyrirtækið Impregilo um að annast framkvæmdirnar hefði verið gert ráð fyrir að Íslendingar yrðu um 30 prósent vinnuaflsins. Hins vegar hefðu eldri spár fjármálaráðuneytisins um að 75 prósent starfsmanna yrðu Íslendingar verið ágiskanir sem reynst hefðu óraunhæfar. Fram kom í máli Friðriks að nú í september hefðu um 1400 starfsmenn verið við Kárahnjúka, þar af um 320 Íslendingar. Hlutfall Íslendinga væri þvi um 25 prósent en Friðrik sagði að búast mætti við það hlutfall ætti eftir að hækka þegar þörf yrði á sérhæfðum fagmönnum á síðari stigum verksins.