Héraðslistinn vann

Héraðslistinn var sigurvegari sveitarstjórnarkosninganna í sameinuðu sveitarfélagi á Héraði í gær. Þá völdu kjósendur hinu nýja sveitarfélagi nafnið Fljótsdalshérað. Kjörsókn var heldur dræm í gær, eða 66,38%. Minnst var kjörsókn meðal íbúa Austur Héraðs þar sem 1600 afþeim 2100 sem voru á kjörskrá búa. Úrslit kosninganna voru á þá leið að Héraðslistinn fékk fjóra menn kjörna, Framsóknarflokkurinn og Sjálfsstæðisflokkur þrjá menn hvor, og listi áhugafólks um sveitarstjórnarmál einn. Skúli Björnsson, oddviti Héraðslistans segir enn ekkert ákveðið um með hverjum verði farið í meirihlutasamstarf, en það verði ákveðið um helgina. Hann segir að lagt verði til að Eiríkur Björgvinsson verði gerður að bæjarstjóra. Kjósendur í gær fengu einnig tækifæri til að segja sína skoðun á því hvaða nafn nýja sveitarfélagið ætti að bera. Fyrir valinu varð nafnið Fljótsdalshérað, sem hlaut mun fleiri atkvæði en nöfnin Egilsstaðabyggð og Sveitarfélagið Hérað, sem einnig voru í boði.