Stöðumælagjöld greidd með gsm

Á næstunni verður hægt að greiða stöðumælagjöld í Reykjavík með gsm-símum. Samningur Reykjavíkurborgar um þetta við félögin Góðar lausnir ehf. og Farsímagreiðslur ehf. verður undirritaður í dag. Árni Þór Sigurðsson, formaður samgöngunefndar Reykjavíkur, segir að það muni líða tvær til fjórar vikur frá undirritun samningsins þar til kerfið verði tekið í notkun. "Við vonum að þetta verði komið fyrir jólatraffíkina," segir Árni. Notandi þjónustunnar þarf að gerast ákrifandi að henni hjá öðru hvoru félaganna. Hann hringir svo í ákveðið númer þegar hann leggur bílnum við stöðumæli og gefur upp staðsetninguna. Þegar hann ekur á brott hringir hann aftur í númerið og stöðvar tímatalninguna. Þannig er greitt nákvæmlega fyrir þann tíma sem bílnum er lagt. Stöðumælaverðir fylgjast með því hvort greitt sé fyrir bílana með því að hringja inn í stjórnstöð þar sem bílnúmerið er slegið inn í tölvu. Þá fæst svar um hæl hvort eigandi bílsins sé að greiða fyrir stæðið. Árni segir að þetta hafi engin áhrif á stöðumælagjöldin, þau verði óbreytt.