AVION hefur góð áhrif

Nýi, íslenski flugrisinn, Avion Group, hefur jákvæð áhrif á rekstur Iceland Express, að sögn eigenda þess síðarnefnda. Iceland Express stefnir í að verða réttum megin við núllið í ár, eftir 30 milljóna króna tap í fyrra. Óformlegar viðræður standa enn yfir við flugfreyjur félagsins, sem sagt var upp störfum fyrir skemmstu. Iceland Express hefur um skeið leitað að fjárfestum, og í því skyni rætt við tíu slíka, en án árangurs. Án fjárfesta stefnir reksturinn samt sem áður í að verða við núllið í ár, og jafnvel réttu megin við það, að sögn forsvarsmanna. Sætanýtingin er 75%, sem er nóg til þess að afkoman sé viðunandi.Ólafur Hauksson, talsamður Iceland Express segir reksturinn baráttu, enda leggi samkeppnisaðilinn mikinn pening í að undirbjóða Iceland Express. Hann segist ekki geta svarað því hvort fyrirtækið skili hagnaði í ár. Ólafur segir að stofnun nýja íslenska flugrisans, Avion Group, muni hafa jákvæð áhrif á rekstur Iceland Express. Risin starfi í flugrekstri, en ekki áætlunarflugi, og hafi 3200 starfsmenn sem þurfi margir að komast milli landa, væntanlegir viðskiptavinir Iceland Express. Óformlegar viðræður standa nú yfir við Flugfreyjufélagið vegna uppsagna allra flugfreyja hjá félaginu. Ólafur segir að um miðja viku ætti að skýrast hvort einhver lending finnst í málinu. Ef svo fer, megi reikna með að allar uppsagnirnar verði dregnar til baka.