Biskup: Kennaraverkfall óþolandi

Kirkjuþing hófst í gær í Grensáskirkju en þingið stendur fram á föstudag. Biskup kom víða við í setningarræðu sinni og vék meðal annars að verkfalli grunnskólakennara. Karl Sigurbjörnsson, biskup, gerði velferð barna að umtalsefni í ræðu sinni í gær. "Það að kennarar skuli enn og aftur finna sig knúna að beita verkfallsvopninu í kjarabaráttu sinni er óþolandi vegna þess að það bitnar á þeim síst skyldi, skólabörnunum," sagði Karl og ítrekaði að kennarar og viðsemjendur sínir yrðu að leysa deiluna hið snarasta. "Enn og aftur erum við minnt á að börnin hafa verið afgangsstærð í íslensku samfélagi, allt of oft afskipt og afrækt," bætti biskup við. Biskup ræddi jafnframt um afstöðu Þjóðkirkjunnar til samkynhneigðra og kallaði eftir áframhaldandi umræðu um málið. Auk þess hvatti hann til vitundarvakningar um umhverfismál líkt og breskar kirkjur hafa beitt sér fyrir. "Hér mættum við Íslendingar leggja við hlustir og gefa gaum að og spyrja okkur hvort við séum ekki á helvegi með gegndarlausri eldsneytissóun okkar." Fjármál kirkjunnar eru á meðal þess sem rætt verður á þinginu í dag.