Biskup mjög ósáttur

Biskup Íslands, Karl Sigurbjörnsson, segir óþolandi að kennarar finni sig knúna til að beita verkfallsvopninu. Það sé brýnt að fundin verði leið til að tryggja kennurum viðunandi kjör. Börnin séu afgangsstærð í einu ríkasta samfélagi heims. Hann segist undrast að ekki sé gerð uppreisn vegna verkfallsins, enda þekki hann sjálfur dæm um að börn fari mjög illa út úr verkföllum. Hann segir óþolandi að kennarar þurfi enn og aftur að nota verkfallsvopnið, enda bitni það á börnunum. Samningsaðilar og stjórnvöld yrðu að taka höndum saman um lausn deilunnar. Biskup sagði jafnframt að skólarnir leggu grunvöll að menntun, velferð og menningu þjóðarinnar. Þar megi ekki slaka á. Hann segir börnin enn og aftur gerð að afgangsstærð í samfélagi okkar, sem sé eitt hið ríkasta í heimi. Spurning sé hvort við höfum misst sjónir á hinum raunverulegu verðmætum. Biskup segir að kannanir leiði í ljós að þriðjungur leikskólabarna sé níu klukkustundur á dag í leikskóla, sem sé allt of langur vinnudagur fyrir lítil börn. Og biskup benti á vaxandi vímuefnaneysla, afbrot og skipbrot sem af því leiddi væri vaxandi vandamál meðal ungmenna. Þá væru sjálfsvíg algengasta dánarorsök ungra manna. Það væri auljóst að börnin væru að kalla á hjálp með skaðlegri hegðun gegn sjálfum sér og öðrum Og biskup sagði í viðtali eftir setningarræðuna að hann væri fyrst og fremst að vekja athygli á líðan barna í verkfallinu. Mörg þeirra færu mjög illa út úr verkfalli og hann vissi til þess dæmi.