Stórtjón þegar Votmúli brann

Ríflega hundrað milljóna króna tjón varð í miklum eldsvoða á Blönduósi í fyrrinótt. Stærsti hlutinn af um fimm þúsund fermetra atvinnuhúsnæði, sem í daglegu tali heimamanna er kallað Votmúli, brann til kaldra kola. Þrjú fyrirtæki voru með starfsemi í þeim hluta sem brann: matvælaverksmiðja Vilkó, pakkhús kaupfélagsins og Bílaþjónustan. Í hinum hluta hússins sem stendur heill eru þrjú önnur fyrirtæki. Þar er pappírspokaverksmiðja, dekkjaverkstæði og ullarþvottastöð. Talið er víst að eldurinn hafi komið upp í matvælaverksmiðju Vilkó í suðurenda hússins. Tæknideild lögreglunnar og fulltrúi Brunamálastofnunar segja hins vegar óljóst hver upptök eldsins séu. Það sé í rannsókn. Rafmagn var tekið af húsinu klukkan átta á mánudagskvöldið. Heimildir Fréttablaðsins herma að þegar það hafi verið sett aftur á um klukkan tíu um kvöldið hafi eldurinn kviknað. Hvernig nákvæmlega er ekki ljóst. Það var flutningabílstjóri sem átti leið í gegnum bæinn sem tilkynnti um eldinn klukkan fjögur um nóttina og skömmu síðar var slökkviliðið á staðnum komið á svæðið. Ekki leið á löngu þar til slökkviliðið á Skagaströnd og Hvammstanga var kallað út. Þegar slökkvistarf stóð sem hæst voru tæplega þrjátíu slökkviliðsmenn að störfum. "Þegar við komum þá logaði suðurendi hússins og eldtungur stóðu upp úr þakinu," segir Hilmar Frímannsson, varaslökkviliðsstjóri á Blönduósi. "Á meðan við vorum að hreinsa burtu tæki og bíla sem stóðu upp við húsið breiddist eldurinn nánast út um allt. Þá sáum við að það var ekkert annað að gera en að bjarga því sem var norðan megin við eldvarnarvegginn." Gríðarlegur eldmatur var í húsinu. Í pakkhúsinu voru gaskútar sem sprungu með miklum hvelli, svo miklum að íbúar í nágrenninu vöknuðu. Einum þeirra varð svo um að hann hringdi í Neyðarlínuna og tilkynnti að sprenging hefði orðið í bænum. Mikinn reyk lagði frá húsinu þar sem fjöldi vörubíladekkja bráðnaði. Reykurinn var svo mikill að hann náði alla leið á Skagaströnd. Andrés Leifsson, sem einnig er varaslökkviliðsstjóri, segir að slökkvistarfið hafi gengið vel miðað við aðstæður. Slökkviliðið hafi verið búið að ná tökum á eldinum um klukkan átta í gærmorgun. Hann segir að gott veður hafi auðveldað slökkvistarfið en það var nánast logn um nóttina. "Ef það hefði verið rok hefði varla þurft að spyrja að leikslokum," segir Andrés. "Þá hefði líklega allt húsið brunnið, þar með talið norðurendinn. Hugsanlegt er að eldurinn hefði þá líka náð til nálægra bygginga. "