Við höldum ótrauð áfram

Fimmtán starfsmenn þeirra þriggja fyrirtækja sem urðu eldinum að bráð í Votmúla á Blönduósi missa vinnuna að minnsta kosti tímabundið. Jóna Fanney Friðriksdóttir, bæjarstjóri á Blönduósi, segir að bruninn sé mjög mikið áfall fyrir bæjarfélagið. "Við ætlum samt að halda ótrauð áfram," segir Jóna Fanney. "Við ætlum ekkert að leggjast í kör. Þegar fólk er búið að jafna sig og búið að fara yfir tryggingamál og annað slíkt verður allt sett í gang aftur. Ég heyri það á forsvarsmönnum fyrirtækjanna." Jóna Fanney segir að bæjarstjórnin hitti nokkra þingmenn í dag og fari yfir stöðuna með þeim. Hún segir alveg ljóst að allt verði gert til að hjálpa því fólki sem eigi um sárt að binda vegna brunans. Hún segir að bruninn í Votmúla sé langstærsti bruninn í manna minnum á Blönduósi. "Það var hringt í mig korter yfir fjögur í nótt og ég kom strax. Ástandið var skelfilegt og það var erfitt að horfa á þetta án þess að geta hjálpað nokkuð til. Strákarnir í slökkviliðinu unnu mjög fagmannlega og í mínum augum eru þeir sannkallaðar hetjur fyrir að hafa stoppað eldinn við eldvarnarvegginn. Ef það hefði ekki tekist hefði nýrisin ullarþvottastöð brunnið til kaldra kola."