Ósætti með frammistöðu Ítala

Óperusöngvarinn Kristján Jóhannsson sem býr á Ítalíu segir ítalska fjölmiðla lítið hafa fjallað um tap Ítala á Laugardalsvelli í gærkvöld. Það bendi til þess að menn séu afar ósáttir við frammistöðuna. Hins vegar afsaki Ítalir sig með því að liðið sem spilaði leikinn í gær hafi verið hálfgert B-lið. Eins og flestir vita eflaust sigruðu Íslendingar Ítali með tveimur mörkum gegn engu í vináttulandsleik í knattspyrnu á Laugardalsvelli í gærkvöld að viðstöddum 20.204 áhorfendum. Leikurinn var fyrsti leikur liðsins undir stjórn Marcelo Lippi og til stóð að byrja stjóratíð hans með glæsibrag, en raunin varð hins vegar önnur. Kristján Jóhannsson óperusöngvari sem býr á Ítalíu segir lítið hafa farið fyrir umfjöllun um eldskírn Lippis í ítölskum fjölmiðlum í morgun. Það segir bara eitt: menn séu mjög ósáttir. Kristján segir Lippi hafa verið að reyna nýjar aðferðir og nýja menn en það hafi einfaldlega ekki gengið upp. Þrátt fyrir tilraunir með nýja leikmenn jánkar Kristján því að leikurinn hafi augljóslega skipt landsliðsmenn Ítalíu miklu máli, enda hafi þeir verið orðnir verulega pirraðir þegar leið á leikinn og ekkert gekk. Hann segir Lippi hafa sagt í viðtali eftir leikinn að þeir þyrftu að fara að taka sig saman í andlitinu.  Aðspurður hvoru megin hjarta sitt hafi slegið í leiknum í gær segist Kristján fyrst og fremst hafa viljað sjá góðan leik og það hafi íslenska liðið sýnt, öfugt við það ítalska, og kveðst hann reyndar ekki muna eftir betri leik hjá íslenska knattspyrnulandsliðinu síðastliðinn aldarfjórðung eða svo. Afsakanir eru sjaldnast langt undan þegar réttlæta þarf slaka frammistöðu og segir Kristján Ítali fyrst og fremst líta á leikinn sem undirbúning fyrir alvöruna, á meðan Íslendingar hafi mætt með sitt sterkasta lið og ætlað sér að vinna. Kristjáni fannst Íslendingar þó leggjast of mikið í vörn síðustu tuttugu mínúturnar og ef hann hefði stjórnað liðinu hefði hann látið það sækja út allan leikinn.  Hægt er að hlusta á viðtal við Kristján Jóhannesson úr hádegisfréttum Bylgjunnar með því að smella á hlekkinn hér að neðan.