Slógust við áhorfendur

Ron Artest, Stephen Jackson og Jermaine O´Neal, leikmenn Indiana Pacers í NBA-deildinni í körfuknattleik, slógust við stuðningsmenn Detroit Pistons á lokamínútu leiks Indiana og Detroit í gærkvöld en leikurinn fór fram í Auburn Hills, heimavelli meistara Detroit Pistons. Ron Artest braut á Ben Wallace þegar 45 sekúndur voru eftir af leiknum. Wallace brást ókvæða við og réðist að Artest. Hófust þá stympingar á milli leikmanna á vellinum. Svo virtist sem tekist hefði að róa leikmenn þegar áhorfandi Detroit kastaði vökva úr glasi sínu yfir Artest sem lá á ritaraborðinu. Artest gerði sér þá lítið fyrir og hljóp upp í áhorfendastæðin og réðist að áhorfandanum og sló hann. Þá varð allt endanlega vitlaust, Stephen Jackson skarst í leikinn og fleiri stuðningsmenn Detroit Pistons. Þegar leikmenn Indiana voru að ganga af velli gekk áhorfandi ögrandi að Ron Artest sem svaraði með höggum. Jermaine O´Neal, félagi Artest í Indiana, gerði gott betur og gaf áhorfandum þungt hnefahögg. Þegar Artest, O´Neal og Jackson gengu loksins inn í búningsklefa hentu áhorfendur í þá ís, bjór og poppkorni. Þetta er versta uppákoma í sögu NBA-deildarinnar og mikill smánarblettur fyrir hana. Forráðamenn deildarinnar hafa ekki gefið frá sér yfirlýsingu um málið en búast má við því að Detroit fái háar fjársektir og heimaleikjabann. Ron Artest, Stephen Jackson og Jermaine O´Neal leika örugglega ekki körfubolta á næstunni. Þeir verða settir í langt keppnisbann og gætu átt yfir höfði sér ákæru frá lögreglu fyrir líkamsárás og þá hugsanlega fangelsisvist. Sýndar verða myndir af þessum ótrúlegu slagsmálum í íþróttafréttum á Stöð 2 í kvöld klukkan 18.55. Þess má geta að Indiana vann leikinn 97-82. Átta aðrir leikir voru í deildinni í gær. Seattle lagði Toronto að velli 101-94, San Antonio vann Boston 92-84, Miami marði Utah 107- 105 eftir framlengingu, Dallas bar sigurorð af New York Knicks 103-101, Denver skellti Chicago 99-81, Phoenix vann góðan sigur á Lakers 107-102, Portland vann Milwaukee 110-98 og Sacramento bar sigurorð af Memphis 107-105.