Ein nauðgun tilkynnt

Um 10 þúsund manns voru enn á götum Reykjavíkur í morgun og var varla þverfótað þar fyrir rusli. Stúlka um tvítugt kærði tvo menn fyrir nauðgun en þeir eru enn ófundnir. Sumir taka nafn Menningarnætur greinilega mjög bókstaflega, vilja lifa alla nóttina og fara ekki úr miðbænum fyrr en næsta dag. Enda þótt hreinsunardeild borgarinnar hafi byrjað að hreinsa rusl um klukkan 4 í nótt, var enn varla þverfótað fyrir rusli og skít rétt fyrir hádegi í dag. Þannig er greinilegt að þúsundir manna telja sjálfsagt að henda hvaða rusli sem er, hvar sem er. Geir Jón Þórisson, yfirlögregluþjónn segir ekki óeðlilegt að rusl verði á götum borgarinnar þegar svo margt fólk komi saman. Þá segir að hann þegar líða tók á nóttina hafi fólk verið í bænum til að skemmta sér og oft með áfengi undir hönd. Hann segir það þó ekki endilega vera gesti Menningarnætur. Mikill erill var hjá lögreglu í alla nótt og langt fram á dag. Engu að síður telur lögregla ekki óeðlilegt að mörg mál komi upp þegar annar eins mannfjöldi safnast saman. Eitt kynferðisbrot var tilkynnt lögreglu í nótt. Stúlkan, sem er um tvítugt, segir tvo menn hafa ráðist á sig um miðnætti og nauðgað. Hún kærði til lögreglu og hlaut aðhlynningu á neyðarmóttöku. Stúlkan er ókunn staðháttum í Reykjavík og er ekki viss hvar árásin var gerð. Að hennar sögn kom önnur kona aðvífandi og stöðvaði ódæðismennina, og telur lögregla að hún geti hjálpað við rannsókn málsins, enda mennirnir enn ófundnir. Hún, og aðrir sem kunna að hafa frekari upplýsingar, er beðin um að hafa samband við rannsóknardeild lögreglunnar.