Bestir þegar mest á reynir

Magnús Þór Gunnarsson, leikmaður Keflavíkur, hefur átt mjög gott tímabil með Keflvíkingum og hefur reynst liði sínu drjúgur í Bikarkeppni Evrópu. Í Evrópuleikjunum fjórum hefur Magnús skorað 18 stig, tekið 4,25 stig og gefið 4,25 stoðsendingar að meðaltali í leik. Blaðamaður Fréttablaðsins sló á þráðinn til Magnúsar þar sem hann var staddur í London á heimleið eftir fyrsta útisigur Keflavíkurliðsins í Evrópukeppni. Hver er lykillinn að velgengni Keflavíkur gegn þessum stóru liðum í Evrópu? "Við erum bara bestir þegar mest á reynir. Stöndum vel saman og náum að peppa okkur vel upp fyrir leikinn." Nú hefur Keflavík góða stöðu í riðlinum og gæti komist í 16 liða úrslit Bikarkeppni Evrópu. Álag keppninnar hefur greinilega haft áhrif á leik liðsins í deildinni hérna heima. Munuð þið halda út í deildinni hér heima ef þið komist áfram í Evrópukeppninni? "Við förum létt með það enda vissum við alltaf að við færum ekki í gegnum heilt tímabil án þess að tapa, tala nú ekki um með þessu aukna álagi sem fylgir því að vera í Evrópukeppninni. Það er allt í lagi að tapa þremur til fjórum leikjum yfir tímabilið svo lengi sem við náum að vera í efstu fjórum sætunum. Þá vinnum við úrslitakeppnina hvort sem er." Nú fullyrtir þú eftir leikinn gegn Madeira að þetta væri bara byrjunin og að þið ætluðuð að vinna þennan titil. Geturðu staðið við það? "Já, ég stend við það. Kannski ekki núna í ár en við munum vinna þennan titil, líklega í næstu keppni." Ef við tölum aðeins um þinn árangur. Þér hefur gengið mun betur í ár en í fyrra. Af hverju? "Ég hætti náttúrlega aldrei að æfa í sumar. Ég var á fullu með landsliðinu í sumar og komst þess vegna í miklu betra form. Það hefur skilað sér með betri árangri í vetur." Hvað erum við að tala um? Æfðirðu þig bara grimmur og byrjaðir að borða grænmeti? "Nei, nei. Þetta kom bara ósjálfrátt með þessum stöðugu æfingum. En maður þarf náttúrlega að hafa hugfast að mataræðið sé í lagi." Margir reka upp stór augu þegar þeir sjá þig. Þú lítur ekki beint út fyrir að vera körfuboltamaður. "Enda nýti ég mér það líka. Andstæðingarnir búast ekki við þessu, gefa færi á sér og þá geng ég á lagið. Set 25 stig á þessa kalla eins og í leiknum gegn Reims." Nú spilið þið gegn nýkrýndum Hópbílabikarmeisturum Snæfells í bikarkeppni KKÍ á sunnudaginn kemur. Álagið á ykkur hefur verið töluvert og þið náðuð til dæmis ekki að leika nægilega vel gegn Njarðvík í hópbílabikarnum. Hvað munuð þið gera gegn Snæfelli? "Við erum búnir að tapa einu sinni á heimavelli í vetur, þegar við töpuðum gegn Njarðvík í Meisturum meistaranna. Við ætlum ekkert að tapa á heimavelli aftur og við ætlum að spila þennan bolta sem við erum að sýna í Evrópukeppninni. Færa hann inn í deildina. Við vinnum leikinn gegn Snæfelli."