Bruni í Klumba í Ólafsvík

Gríðarlegt tjón varð þegar fiskverkun Klumba í Ólafsvík brann til grunna í nótt Tjónið er talið nema vel yfir hundrað milljónum króna. Leifur Halldórsson, sem er einn eiganda Klumba þar sem 25 manns störfuðu, segir þetta geysilegt áfall fyrir aðstandendur fiskverkunarinnar, byggðarlagið allt og fólkið sem unnið hafi við verknunina.  Hann segir að fólkið verði haft á launum eitthvað áfram og síðan verði reynt að útvega því vinnu, svo verði vonandi hægt að byggja húsið upp að nýju. Kristinn Jónasson bæjarstjóri í Ólafsvík hefur líkt og Leifur áhyggjur af afleiðingum brunans fyrir bæjarfélagið og segir það áfall að missa svona stóran vinnustað úr bænum. Hann segist ánægður með að forsvarsmenn fyrirtækisins séu ákveðnir í því að byggja húsið upp aftur. Gerist það hins vegar ekki yrði það mikið áfall. Tilkynnt var um eld í austurhluta hússins um klukkan hálf tvö í nótt. Þegar slökkvilið kom á staðinn var eldurinn þegar orðinn mikill og breiddist hann hratt út. Aðstæður á staðnum voru erfiðar vegna mikils vinds. Talið er að eldurinn hafi komið upp í kyndiklefa hússins sem var um 1100 fermetrar að stærð. Í kyndiklefanum var ellefu hundruð kílówatta rafmagnstúrbína að sögn Leifs Halldórssonar. Ekki er þó búið að staðfesta neitt varðandi upptök eldsins. Tjónið er erfitt að meta en fiskverkunin var með tryggingu frá Sjóvá Almennum. Leifur Halldórsson á fiskverkun Klumba með sonum sínum og reka þeir einnig frystihúsið Frostfisk í Þorlákshöfn. Tjónið er að hans mati ómögulegt að meta til fjár en eingöngu húsið var metið á hundrað milljónir króna. Hann segir tjónið ómetanlegt, fólk missi vinnunna. Framleiðslan í húsinu hafi verið mikil, í húsinu hafi unnið 25 manns, sem hafi framleitt fyrir hálfan milljarð króna á ári. Margir missi nú úr aski sínum. Hann segir að það sé aldrei hægt að vera tryggður nógu vel fyrir svona, þó að þeir hafi haft þokkalega tryggingu. Hann segir vinnslu í bæjarfélaginu helda áfram þrátt fyrir þetta, enda það þýði ekkert að gefast upp. Hann segist vera orðinn svo sjóaður í lífinu að þetta hafi ekki fengið jafn rosalega á sig og við hefði verið að búast.