Forsendur kjarasamninga bresta

Alþýðusamband Íslands spáir því að verðbólga verði rúm fjögur prósent á næsta ári og forsendur kjarasamninga bresti. Ólafur Darri Ólafsson, hagfræðingur samtakanna, sakaði stjórnvöld um að beita atvinnuleysi sem hagstjórnartæki á ársfundi ASÍ í dag. Þótt hagdeild ASÍ segi efnahagshorfur um margt góðar segir að lítið megi út af bera til að gerð verði sömu mistök í hagstjórn og á árunum 1999 til 2002 og stöðugleikanum verði ógnað. Veruleg hætta sé á því að kjarasamningum verði sagt upp í árslok 2005 ef verðbólga vex jafn hratt og spáin gerir ráð fyrir. Ólafur Darri segir að Seðlabankinn sé látinn bera nær alla ábyrgð á að halda þenslunni í skefjum og þá með stýrivaxtahækkunum. Það sé hins vegar mjög sársaukafullt fyrir heimilin. Hann segir að það sem ASÍ hafi verið að kalla eftir sé að ríkisvaldið noti ríkisfjármálin til að hamla gegn þenslu. „Það þýðir á mannamáli að það þarf að vera með aðhaldssöm fjárlög. Við getum ekki merkt mikið aðhald í fjárlögunum og óttumst að þau frekar kyndi undir verðbólgunni en að slá á hana,“ segir Ólafur Darri.  Búist er við góðum hagvexti fram til ársins 2006, örlítið dragi úr atvinnuleysi og verði nálægt þremur prósentum á árunum 2005 til 2006. Svo mikið atvinnuleysi er óvanalegt þegar hagvöxtur er mikil Ólafur Darri segir það í takt við hugmyndir á undanförnum árum um að beita atvinnuleysi sem hagstjórnartæki. Þær hafi til að mynda birst í innflutningi á lágt launuðu vinnuafli sem búi við slæmt atlæti meðan atvinnuleysistölur hreyfist lítið. Ólafur Darri segir þetta óviðunandi og segir ASÍ leggja áherslu á að farið verði í gegnum góðærið framundan með því að ganga hægt um gleðinnar dyr í ríkisútgjöldum, fresta framkvæmdum og einhverjum atriðum í ríksrekstri sem hugsanlega mættu bíða í 1-2 ár. Þar með væri hægt að stuðla að lægri verðbólgu.