Norðurljós dótturfélag Og Vodafone

Norðurljós eru orðin dótturfélag Og Vodafone. Fjölmiðlar Norðurljósa, þar á meðal Stöð 2 og Bylgjan, verða þar með skráðir í Kauphöll Íslands. Jafnframt eru gerðar skipulagsbreytingar sem fela í sér framkvæmdastjóraskipti. Sigurður G. Guðjónsson víkur fyrir Gunnari Smára Egilssyni. Nýir stjórnendur kynntu kaupin fyrir starfsfólki Norðurljósa í hádeginu og tóku sérstaklega fram að staðinn yrði vörður um ritstjórnarlegt sjálfstæði fjölmiðlanna. Skarphéðinn Berg Steinarsson, stjórnarformaður Norðurljósa, segir að hluthafar Norðurljósa taki yfir hlutafjáreign félagsins í Og Vodafone, og, Og Vodafone kaupir Norðurljós. Hann segir fjölmörg tækifæri liggja í samstarfi þessara félaga. Einnig er hagurinn í þessu sá að nú verði til skráð fjölmiðlafyrirtæki sem hafi verið markmið eigenda Norðurljósa í nokkuð langan tíma. Jafnhliða hættir Sigurður G. Guðjónsson störfum sem framkvæmdastjóri. Skarphéðinn segir hann staðið sig einstaklega vel og komið fyrirtækinu úr því að vera nánast gjaldþrota og í það sem það er í dag. „Leiðir skilja núna og við þökkum honum fyrir vel unnin störf,“ segir Skarphéðinn.   Auk Sigurðar hætta Marinó Guðmundsson fjármálastjóri og Karl Garðarsson rekstrarstjóri. Gunnar Smári Egilsson, útgáfustjóri Fréttar, verður nýr framkvæmdastjóri og Hermann Hermannsson fjármálastjóri. Gunnar Smári engar stórvægilegar breytingar á dagskránni. Starfsfólki verði ekki fækkað heldur þvert á móti. Hann segir framrásina sem verið er að skipuleggja felast annars vegar í því að efla þá miðla sem séu til staðar og hins vegar að stofna nýja, án þess að vilja fara nánar út í þá sálma. Þó segir í tilkynningu til starfsfólks Norðurljósa í dag að með samvinnu við símarekstur megi þróa svokallaða nýmiðlun á Netinu, í síma og stafrænu sjónvarpi.