Sigurður kveður

Sigurði G. Guðjónssyni, framkvæmdastjóra Norðurljósa og útvarpsstjóra Íslenska útvarpsfélagsins, var sagt upp störfum eftir tæplega þriggja ára starf á miklum umbrota- og átakatímum í sögu félagsins. Sigurður kvaddi starfsfólkið með tölvupósti í morgun, þar sem hann vitnaði í John Lennon sem sagði: „Life is what happens to you while you´re busy making other plans.“ Sigurður G. segist hafa skynjað í miðjum klíðum, þegar hann var að undirbúa framsókn félagsins sem meðal annars fólst í að auka eignarhlutinn í Og Vodafone - ekki öfugt - að það væri ekki gert frekar ráð fyrir sér. Hann segir að í viðskiptum taki menn eina ákvörðun í dag og aðra á morgun með hliðsjón af því hvað sé fyrirtækinu fyrir bestu hverju sinni. „Það varð ofan á að fara aðra leið en upphaflega var stefnt að. Þar með var ég út úr myndinni og þannig verður það bara að vera,“ segir Sigurður. Sigurður G. kveður félagið ekki sáttur, en hann er sáttur við hvernig hann skilur við það og ætlar nú að taka sér frí fram að jólum. Hann segir fyrirtækið mjög gott með völdum manni í hverju starfsrúmi. Og hann var vinsæll meðal starfsmanna; þeir komu í óvænta heimsókn til hans í morgun að kveðja og þakka fyrir samstarfið undanfarin ár sem hann sjálfur líkir við bálviðri oft og tíðum. Sigurður sagði klökkur við það tækifæri að hann væri „algjörlega shocked“ yfir þessari heimsókn.