Óþefur yfir Þorlákshöfn

Bæjarstjóri Ölfuss fundaði með Heilbrigðiseftirliti Suðurlands í byrjun mánaðarins til að knýja á um úrbætur vegna lyktarmengunar í Þorlákshöfn, en hún hefur plagað bæjarbúa síðustu ár. "Aðallega er þarna um að ræða tvö fyrirtæki sem verið hafa undir eftirliti okkar," sagði Elsa Ingjaldsdóttir, framkvæmdastjóri Heilbrigðiseftirlits Suðurlands. Hún segir þó nokkrar kvartandir hafa borist á árunum 2000 til 2002. "Árið 2002 voru starfsleyfi fyrirtækjanna endurnýjuð og ástandið batnaði. Í fyrra bárust til dæmis engar kvartanir, en núna í haust bárust fjórar kvartanir." Í kjölfarið fundaði Ólafur Áki Ragnarsson bæjarstjóri með heilbrigðiseftirlitinu." Elsa segir að í kjölfar kvartananna í haust hafi verið gengið úr skugga um réttmæti þeirra og atriðum kippt í liðinn sem aflaga höfðu farið. Þá leggur hún áherslu á að embættinu berist kvartanir svo að hægt sé að kanna mál. Ólafur Áki vill að Heilbrigðiseftirlitið sinni eftirlitsskyldu sinni, en bætir við að ástandið hafi heldur skánað frá því í haust. "Það er alveg ljóst að við munum ekki una við þetta ástand lengur," sagði hann.