Birgir hóf leik í morgun

Birgir Leifur Hafþórsson, kylfingur úr GKG, hóf leik í morgun á lokastigi úrtökumótanna fyrir evrópsku mótaröðina á San Roque golfvöllunum á Spáni. Alls mæta 168 kylfingar til leiks, 35 efstu kylfingarnir öðlast þátttökurétt á mótaröðinni en 75 efstu öðlast takmarkaðan keppnisrétt. Leiknir verða sex hringir. Margir þekktir kylfingar taka þátt í úrtökumótinu að þessu sinni en 78 kylfingar sem voru á evrópsku mótaröðinni í ár eru með á úrtökumótinu og reyna að komast aftur inn. Keppnin er því gríðarlega hörð. Þegar Birgir Leifur hafði leikið þrjár holur nú á hádegi var hann á einu höggi yfir pari. Þeir sem ræstir voru út fyrstir höfðu lokið við níu holur og voru tveir kylfingar, frá Skotlandi og Wales, eftir á þremur höggum undir pari.