Nafni breytt með trega

Félag dagabátaeigenda hefur með trega verið knúið til að breyta nafni sínu í Félag kvótabátaeigenda að því er fram kemur í ályktunum félagsins á aðalfundi sem haldinn var í Borgarnesi á laugardag. "Á öndverðu vorþingi síðast liðnu, í hita leiks fjölmiðlafrumvarps, er knúin á okkur kvótasetning á óþingræðislegan og ólýðræðislegan hátt, aðför sem skerti afla okkar um 20 til 40 prósent," segir í ályktuninni. Á fundinum var ályktað um fjölda mála sem félagsmönnum eru ofarlega í huga. Til að mynda lýsir félagið "furðu sinni og undrun" á að forsætisráðherra, sjávarútvegsráðherra og formenn þingflokka skuli ekki "brjóta odd af oflæti sínu" og svara erindi Umboðsmanns Alþingis þar sem hann kemst að þeirri niðurstöðu að í lögum um skiptaverðmæti og greiðslumiðlun innan sjávarútvegsins sé brotið gegn meðgrein 74. greinar stjórnarskrárinnar um félagafrelsi.  Aðalfundi félagsins var svo frestað "þar til úrskurður málaferla vegna greiðslumiðlunar-laga er útkljáður í undirrétti", eins og segir í ályktun fundarins.