Holtasóley er þjóðarblóm Sama

Sömum brá í brún þegar Guðni Ágústsson landbúnaðarráðherra tilkynnti heimsbyggðinni á föstudag að Íslendingar hefðu valið sér holtasóley sem þjóðarblóm. Holtasóleyin hefur nefnilega verið þjóðarblóm í Lapplandi um árabil enda afar algeng þar í landi. Raunar kom það eintak af blóminu, sem fyrst var lýst sem tegund, frá Lapplandi. Var það árið 1737. Frá þessu greinir Ágúst H. Bjarnason grasafræðingur á heimasíðu sinni en hann er þeirrar skoðunar að klófífa væri heppilegust sem þjóðarblóm Íslendinga. Sigurður Helgi Guðjónsson lögmaður er af Sömum kominn og er himinlifandi yfir því að Íslendingar hafi leitað til Samanna eftir þjóðarblómi. "Ég fagna þessu mjög, þetta hlýtur að vera fyrsta skrefið í átt að sameiningu Íslands og Lapplands," sagði Sigurður Sami í samtali við Fréttablaðið í gær. Um 200 þúsund manns búa í Lapplandi sem, eins og stendur, tilheyrir Finnlandi.