Ísjaki til Parísar

Íslendingar geta, þora og vilja, segir Sigríður Snævarr, sendiherra í París, og vonast til að innan tíðar verði þessi staðreynd öllum Frökkum ljós. Þar bindur hún vonir við árangur af umfangsmestu kynningu á Íslandi til þessa, þriggja mánaða vísinda- og menningarhátíð sem hefst í París í lok mánaðarins. Rúmlega tuttugu og tveggja tonna þúsund ára gamall ísjaki úr Jökulsárlóni hefur nú hafið ferð sína til Parísar þar sem hann verður sýndur í tengslum við hátíðahöldin. Hann var hífður upp í dag, fer í skip í kvöld. Siglt verður með hann til Rotterdam og farið svo með hann í bíl til Parísar þangað sem hann á að vera kominn 27. september þegar hátíðin stóra hefst. Sigríður Snævarr, sendiherra Íslands í Frakklandi, segir að hugmyndin sé að setja klakann fyrir framan safnið, sem heitir höll uppgötvananna á íslensku. Hún segir það enga smá upplifun fyrir Parísarbarn að fá að snerta jökul og líklega sé Ísland eina landið sem geti sent jökul til heimsborgarinnar, þar sem allt er til, en enginn ísjaki! Ari Trausti Guðmundsson, jarðfræðingur, segir það ekki hafa gengið þrautalaust fyrir sig að velja jakann, sem til að mynda hafi orðið að rúmast í frystigámi svo eitthvað yrði eftir þegar áfangastað yrði náð. Hann segir að fyrsti ísjakinn hafi verið of lítill, en svo hafi tekist að draga einn mátulegan að landi að lokum, sem þó þurfti að ganga í með keðjusögum og loftpressu, til að rúnna hann til.  Það er metnaðarfull dagskrá framundan í París, og vonast aðstandendur til að allt spili þetta saman til að auka hróður landsins í sem víðtækasta skilningi. Sveinn Einarsson, verkefnisstjóri segir að vonir standi til að þetta hafi áhrif á ferðamannastraum til Íslands, enda verði verkefnið kynnt um alla Parísarborg og kannski detti nú einhverjum í hug að íslenski fiskurinn sé betri en annar fiskur í veröldinni.