Verkfall háseta hafrannsóknarskipa

Verkfall háseta skipa Hafrannsóknarstofnunar hefst klukkan fjögur á mánudag nái Sjómannafélag Reykjavíkur og samningsnefnd fjármálaráðuneytisins ekki að semja á fundi sama dag. Bitbeinið er sjómannaafsláttur hásetanna. Jónas Garðarsson, formaður Sjómannafélags Reykjavíkur, segir félagið vilja að kjarasamningurinn falli úr gildi eða verði uppsegjanlegur nemi stjórnvöld sjómannaafsláttinn úr gildi. Baldur Guðlaugsson, ráðuneytisstjóri fjármálaráðuneytisins, segir að viðræðurnar strandi á þessu atriði. "Þeim hefur verið boðið að inni í samningnum verði bókun um að verði samið um það í kjarasamningum sjómanna á almennum markaði að afnám sjómannaafsláttar leiði til þess að kjarasamningar verði uppsegjanlegir skuli það sama gilda um þennan samning. Ríkið telur eðlilegt að stefnan varðandi atriði sem þetta sé mörkuð í viðræðum aðila á hinum almenna vinnumarkaði en er tilbúið að fallast á að niðurstaða sem þar fæst gildi einnig um sjómenn sem starfa hjá ríkinu." Jónas segir slíka bókun ekki hafa gildi. "Við erum að semja beint við fjármálaráðherra. Hann kom með frumvarp um skerðingu sjómannaafsláttar. Þess vegna viljum við semja beint við hann um að samningurinn verði laus eða uppsegjanlegur ef frumvarpið nái fram að ganga." Næsti fundur samningsaðila er á mánudaginn klukkan hálf ellefu og því fimm og hálf klukkustund til stefnu. Jónas segir það ekki knappan tíma. "Það þarf ekki nema eina mínútu. Þetta er ekkert mál til að sitja yfir. Þetta er aðeins spurning um já eða nei." Jóhann Sigurjónsson, forstjóri Hafrannsóknarstofnunar, segir það órætt hvernig staðið verði að heimkomu skipanna komi til verkfalls. Hann voni að deilan leysist. "Við erum alltaf í mikilvægum rannsóknarleiðöngrum og auðvitað er það bagalegt að geta ekki unnið eftir þeim áætlunum sem við setjum okkur."