Brunavörnum ábótavant

Eignatjón í bruna var helmingi minna í fyrra en þrjú ár á undan. Þrátt fyrir það er brunavörnum ábótavant á nærri helmingi gistiheimila og í um þriðjungi framhaldsskóla landsins. Í nýrri skýrslu Brunamálastofnunar fyrir árið 2003 kemur fram að nauðsynlegt sé að taka á ástandinu hjá gistiheimilum sem hefur lítið skánað í sjö ár. Brunavarnir eru í „ágætu“ eða „sæmilegu“ ástandi í 54 prósent tilvika en slæmu ástandi á 46 prósent gistiheimila. Björn Karlsson brunamálastjóri segir farið eftir byggingareglugerð í útektum. Hann segir brunavarnir ekki endilega í slæmu ástandi því menn séu með alls konar bráðabirgðaaðgerðir. Aðspurður hvort byggingareglugerðin sé þá of stíf hvað brunavarnir varðar segir Björn svo ekki vera. Það taki oft tíma að uppfylla slíkar reglugerðir algjörlega en á meðan sé hægt að leysa málið til bráðabirgða. Björn nefnir sólarhringsvöktun, að gefnu leyfi slökkviliðisstjóra, sem dæmi. Hann segir að málinu verði fylgt eftir með því að ræða við samtök ferðaþjónustunnar. Brunavarnir hafa hins vegar batnað í framhaldsskólum landsins. Þeir fá ágætis einkunn eða sæmilega í rúmlega 70 prósent tilvika en sú tala var í 40 prósentum árið 1998. Enn er brunavörnum þó ábótavant í nærri þriðjungi framhaldsskóla. Eignatjón núna er helmingi lægra en það hefur verið sl. þrjú ár og enginn hefur látist í bruna hérlendis í tvö og hálft ár. Það finnst brunamálastjóra bestu fréttirnar úr ársskýrslu stofnunarinnar og þakkar þetta öflugu starfi slökkviliðanna og góðum forvörnum