Kani í kvennaliði Keflavíkur

Körfuknattleiksdeild Keflavíkur vinnur nú hörðum höndum að því að fá útlendinga til félagsins, bæði fyrir karla- og kvennaliðið. Kvennaliðið varð í fyrra fyrsta liðið í áratug sem varð Íslandsmeistari án þess að tefla fram erlendum atvinnuleikmanni en liðið vann fimmfaldan sigur á síðasta tímabili. Sverrir Þór Sverrisson, þjálfari meistaraflokks kvenna, var vongóður um að málið yrði frágengið um helgina en vildi þó ekki nefna nein nöfn.  „Þetta kemur endanlega í ljós í kvöld. Ég hef unnið að þessu í gegnum umboðsskrifstofu úti og vonast til að ganga frá samningi í kvöld,“ sagði Sverrir. Karlalið Keflvíkinga hefur nú þegar gengið frá samningi við bandarískan leikmann sem heitir Anthony Glover og mun væntanlega ráða annan leikmann áður en tímabilið hefst.