Bókanir í París aukist um 35%

Farþegabókanir Icelandair í París hafa aukist um 35 prósent frá Íslandskynningunni í september að sögn starfsfólks fyrirtækisins í París. Icelandair í París gekkst fyrir markaðsátaki á sama tíma og menningarkynningin stóð yfir í september. Farþegabókanir tóku kipp og eru í september, október og nóvember um 35 prósent fleiri en í sömu mánuðum á síðasta ári. "Það er ekki spurning að þessi mikla kynning er að skila sér í fleiri ferðamönnum til Íslands og almennt auknum áhuga á landinu", segir Helgi Már Björgvinsson, svæðisstjóri Icelandair í Frakklandi. Í tengslum við Íslandskynninguna á vegum sendiráðs Íslands og menntamálaráðuneytisins efndi Icelandair ásamt Ferðamálaráði og Höfuðborgarstofu til mikillar auglýsingaherferðar í neðanjarðarlestum Parísar, Metro. "Við settum upp alls 1387 risastór veggspjöld í umfangsmestu herferð sem við höfum nokkru sinni staðið fyrir í borginni. Í þeirri herferð lögðum við áherslu á sömu þætti og í Íslandskynningunni, það er hreina orku, menningu og afþreyingu.", segir Helgi Már.