Stúlkur skara fram úr

Ísland er talsvert fyrir ofan meðaltal í könnun OECD á stærðfræðikunnáttu, eða í 10.-14. sæti, við meðaltal í lestrarkunnáttu og rétt fyrir neðan meðaltal í kunnáttu í náttúruvísindum. Langmest áhersla var á að kanna stærðfræðikunnáttu að þessu sinni í PISA-rannsókninni 2003 sem náði til OECD-landanna og annarra ríkja. Þorgerður Katrín Gunnarsdóttir menntamálaráðherra segir ánægjulegast að íslenskir nemendur standi sig betur í stærðfræði en áður hafi sést í svo stórri rannsókn. "Það hafa orðið miklar framfarir frá því í síðustu könnun." Júlíus K. Björnsson, einn stjórnenda verkefnsins á Íslandi, sagði á blaðamannafundi í gær að athygli vekti hve miklu betur 15 ára stúlkum gengi hér á landi í stærðfræði en drengjum. Stúlkurnar eru í 8. sæti af öllum stúlkum sem könnunin tók til en strákarnir í 20. sæti. Munurinn er að vísu miklu minni á höfuðborgarsvæðinu en á landsbyggðinni. "Í allflestum löndum í könnuninni voru strákarnir betri. Mynstrið er allt öðru vísi hér. Við þurfum bersýnilega að sparka strákunum kirfilega upp á við til að bæta okkur enn meira." Þorgerður Katrín segir að þessar niðurstöður hafi vakið athygli innan OECD en þýði hugsanlega að ný verkefni blasi við í jafnréttisumræðunni. Í skýrslu OECD segir að Ísland sé eitt þeirra landa þar sem lestrarkunnáttan hafi versnað að meðaltali og einnig meðal hinna lökustu. Þorgerður Katrín túlkar niðustöðuna í náttúrufræði og lestri þannig að við höfum hvorki versnað né bætt okkur. Menntamálaráðherra bendir líka á sem jákvætt atriði að hvergi hafi greinst minni munur á niðurstöðum milli einstakra skóla en á Íslandi. Júlíus K. Björnsson segir að þetta bendi til að óvíða sé jafnrétti til náms jafnmikið og hér á landi.