Slakari en áður

Árangur íslenskra nemenda hefur heldur versnað samanborið við erlenda jafnaldra þeirra, samkvæmt fyrstu niðurstöðum alþjóðlegrar könnunar á vegum OECD. Aðeins í stærðfræði hefur Íslendingum fleygt fram. Niðurstöður PISA-rannsóknarinnar verða kynntar klukkan ellefu í kvöld, en þýska fréttatímaritið Stern greinir frá þeim engu að síður. Samkvæmt fréttum þeirra og annarra miðla eru Íslendingar í 11. sæti í stærðfræðikönnuninni, og er það besti árangur íslensku nemendanna í ár. Lestrargeta íslenskra nemenda kemur þeim í sautjánda sæti, fyrir neðan Pólland og Bandaríkin, svo að dæmi séu tekin. Í náttúrufræði eru íslenskir unglingar sæti neðar, eða í 18. sæti, en ögn betri í að leysa þrautir, í 16. sæti. Alls voru tóku 250 þúsund nemendur í fjörutíu löndum þátt í könnuninni og voru íslensku nemendurnir alls staðar fyrir ofan miðjan lista. Finnar bera af öðrum þjóðum, eru efstir í öllum flokkunum fjórum. Árangur hinna Norðurlandaþjóðanna er svipaður og hjá Íslendingum. Nemendur í Skandinavíu eru slakari en þeir íslensku í stærðfræði, betri í lestri en í öðrum álíka. Suður-kóreskir nemendur koma næst á eftir Finnunum, Japanar standa sig vel sem og Kanadamenn. Árangur Pólverja kemur einnig á óvart, því að þeir hafa tekið stórtækum framförum frá því að niðurstöður fyrstu PISA-könnunarinnar voru kynntar fyrir þremur árum síðan. Frá því árið 2000 hafa þeir tekið grunnskóla landsins til gagngerrar endurskoðunar, tekið upp skólaskyldu til átján ára aldurs og bætt inn í einu skólastigi, sambærilegu við gömlu, íslensku gagnfræðaskólana. Að auki hefur Spiegel eftir menntamálaráðherra landsins, að það sé ekki tilgangur framhaldsskólanna að troða staðreyndum inn í höfuð nemendanna, heldur búa þá sem best undir lífið og að skilja heiminn.