Auknar kröfur í matvælaiðnaði

Matvælavinnsla er í síauknum mæli að færast úr eldhúsum mötuneyta og heimila til iðnfyrirtækja. Kröfurnar eru miklar, því ekki einungis þarf maturinn að vera fljótlegur heldur líka hollur.  Á árlegri kynningu Samtaka Iðnaðarins á framleiðslu í matvælaiðnaði er margt að skoða og að sjálfssögðu smakka. Kröfur neytenda hafa aukist gríðarlega síðustu ár og hefur það kallað á fjölbreyttara vöruúrval. Liðin er sú tíð að einungis örfáar tegundir osta fáist, nokkrar tegundir af jógúrt, bláberjaskyr, rúllupylsa og grænar baunir. Nú koma reglulega á markað ný tilbrigði við gömul stef og svo líka hreinar nýjungar. Talað hefur verið um skyrbyltingu í kjölfar þess að neytendur áttuðu sig á hollustu próteinsins í mysu en nú má enginn lengur vera að því að hræra skyrið sjálfur og helst á að vera hægt að drekka það. Starfsmenn mötuneyta fjölmenntu í dag, enda margir að kynna sniðugar lausnir fyrir stóreldhús, lausnir sem snúast um góðan mat með lítilli fyrirhöfn. Meðal þeirra sem sáust á Grand hótel í hádeginu í dag var Elín Helgadóttir, matreiðslumaður í Engidalsskóla. Hún segir þetta nýtast sér vel, enda sé verkfall í skólunum og á meðan sé gott að nýta tímann í að fara í heildsölur og fleira í þeim dúr.