SVÞ mótmæla lokun Hverfisgötu

Samtök verslunar og þjónustu hafa lýst yfir undrun á því að Hverfisgötu hafi verið lokað í dag í tilefni bíllausa dagsins. Samtökin telja þetta mikið skilningsleysi á hagsmunum rekstraraðila í miðborg Reykjavíkur. Með þessu sé fólk hrakið úr miðbænum og þeir sem vegna vinnu sinnar þurfa að fara í miðbæinn lendi t.d. í því við bílastæðahús að komast ekki inn í þau fyrr en eftir níu í kvöld og síðan ekki heim fyrr en eftir sex annað kvöld. SVÞ mótmæla þessari ákvörðun fyrir hönd rekstraraðila í miðborginni og telja að borgaryfirvöld þurfi að beita öðrum aðferðum til að fá fólk til að nota almenningssamgöngur en að loka miðborginni eins og nú er gert.