Stuðningur við Jón Steinar

Undirskriftasöfnun er hafin meðal lögmanna til stuðnings Jóni Steinari Gunnlaugssyni í embætti hæstaréttardómara. Hópurinn telur að Jón Steinar, að öðrum umsækjendum ólöstuðum, njóti ekki sannmælis í umsögn Hæstaréttar, að sögn Sveins Andra Sveinssonar hæstaréttarlögmanns í samtali við mbl.is, en þar staðfestir hann einnig að hann sé í hópi þeirra sem að undirskriftasöfnuninni standa. Þá segir hann að lögmannsstörf almennt hafi lítið vægi í umsögn Hæstaréttar um umsækjendurna um stöðu Péturs Kr. Hafstein sem veitt verður frá og með næstu mánaðamótum. Undirskriftahópurinn telur Jón Steinar Gunnlaugsson í fremstu röð íslenskra lögfræðinga og að hann eigi að baki glæsilegan feril. Hópurinn telur því Jón Steinar afar vel að því kominn að verða skipaður dómari við Hæstarétt og minnt á að lengi hafi verið minnt á nauðsyn þess að starfandi lögmaður verði skipaður dómari. Þeir sem að þessu standa hvetja því Geir H. Haarde, settan dómsmálaráðherra, til að leggja sjálfstætt mat á kosti umsækjenda og hagsmuni Hæstaréttar til framtíðar litið, þegar hann veitir embættið.