Strandverðir lélegastir

Breskir sjónvarpsáhorfendur eru á því að Strandverðir séu lélegasti bandaríski sjónvarpsþáttur frá upphafi. Í nýlegri könnun sjónvarpstímarits í Bretlandi kemur einnig fram að þættirnir um Simpson-fjölskylduna þykja þeir bestu sem komið hafa frá sjónvarpsrisanum í vestri. Auk þáttanna um strandverðina íturvöxnu þykja sápuóperan glæstar vonir, Jerry Springer og Extreme Makeover með því slakara sem sést hefur í bresku sjónvarpi. Öðru máli gegnir hins vegar um Dallas fjölskylduna sígildu, Twin peaks og X-files, sem eru þættir sem ilja enn breskum sjónvarpsáhorfendum um hjartarætur.