Börn hringja meira sjálf

Börn eru í auknum mæli sjálf farin að tilkynna um ofbeldi og vanrækslu. Sjöfalt fleiri börn hringja í Neyðarlínuna vegna þessara mála nú en um síðustu áramót. Neyðarlínan, 112, hefur tekið á móti símtölum er varða barnavernd síðan rétt fyrir síðustu áramót, en í febrúar var þessi leið auglýst sérstaklega. Þegar slíkt símtal berst metur Neyðarlínan samkvæmt ákveðnum reglum þörfina á hvort grípa þurfi inn í tafarlaust eða gera aðrar ráðstafanir, en hefur í öllum tilfellum samband við viðkomandi barnaverndarnefndir. Það færist sífellt í aukana að börnin sjálf tilkynni um ofbeldi eða vanrækslu. Kristján Hoffmann hjá Neyðarlínunni segir aukninguna allt að því sjöfalda miðað við það sem þekkt var áður. Hann segir börnin hafa mikið traust á Neyðarlínunni, sem sjáist á því að nú þegar hafi 4-500 börn hringt það sem af er árinu. Hann segir að áður hafi 0,01% tilkynninga komið frá börnum, en nú séu börn um 8-10% þeirra sem hringi.