Þolendurnir þurfa aðstoð

Þolendur eineltis brotna saman og ná sér ekki nema með utanaðkomandi aðstoð hafi eineltið verið langt og viðvarandi. Rannsóknir sýna að í fyrstu hafa þolendur eineltis tilhneigingu til að leiða það hjá sér. Ragnar Ólafsson sem hefur meistarapróf í félagssálfræði og rannsóknaraðferðum í sálfræði flutti fyrirlestur á vegum rannsóknarstofnunnar í hjúkrunarfræði um viðbrögð þolenda við einelti í skólum og á vinnustað. Það kemur í ljós að viðbrögð við einelti eru svipuð og fara eftir magni eineltisins. Ragnar segir viðbrögðin fyrst í stað þau að menn svari fyrir sig, en ef ekkert gerist verði viðbrögðin hlédrægari og við það aukist vanlíðanin. Hann segir þetta munstur bæði gilda um einelti í skólum og á vinnustöðum Ragnar segir að þessar niðurstöður svona rannsókna megi nýta til þess að veita þolendum aðstoð við hæfi. Hann segir mikilvægt fyrir þann sem aðstoði að vita á hvaða stigi sá sem fyrir eineltinu verður sé og rannsóknir geti hjálpað til við að klæðskerasníða meðferðir við einelti.