Bólusetning virkar bara á 25%

Bólusetning gegn flensu virkar einungis á einn af hverjum fjórum sem láta bólusetja sig, samkvæmt nýrri viðamikilli rannsókn. Ítalskur læknir sem stóð að henni segir það ekki góða fjárfestingu fyrir fyrirtæki að bólusetja alla starfsmenn sína eða að stuðla að því að bólusetja stóran hluta þjóðar. Þessi rannsókn á áhrifum bólusetningar gegn flensu hófst fyrir sjö árum. Alls hafa tæplega 60 þúsund manns verið skoðaðir í rannsókninni, og eru niðurstöður hennar að áhrif bólusetningar séu takmörkuð. Vittorio DeMicheli, ítalskur læknir, segir að úr hundrað manna hópi sem fái bólusetningu við flensu, muni aðeins 25 sleppa við flensuna. 75% fái flensuna hvort sem bólusett sé eður ei. Niðurstöður þessarar rannsóknar hafa vakið mikla athygli annars staðar á Norðurlöndum á síðustu dögum. DeMicheli segir eingöngu sé ástæða til að mæla með bólusetningu á fólki sem sé í áhættuhópi, eins og til að mynda eldri borgarar. Hins vegar sé alger óþarfi að stefna að allsherjar bólusetningum eins og nú sjáist vísbendingar um. Á heimasíðu Landlæknis kemur til dæmis fram að í fyrra hafi um 60.000 Íslendingar verið bólusettir. DeMicheli segir ekkert réttlæta að fyrirtæki bólusetji alla starfsmenn sína, eða að fólk á besta aldri láti yfirhöfuð bólusetja sig, kostnaðurinn sé allt of mikill miðað við takmarkaðan árangur, og hann bendir ennfremur á að mjög lítill hluti samfélagsins fær flensu núorðið, eða í mesta lagi um fimm prósent þjóðarinnar. DeMicheli segir það aðra ástæðu fyrir því að ekki sé rétt að mæla með bólusetningu.