Koma heim í lok vikunnar

Íslendingarnir þrír sem særðust í sjálfsmorðsárásinni í Kabúl á laugardag koma heim til Íslands í lok vikunnar. Þeir ætla að hugsa sinn gang og meta framhaldið, en halda líklega aftur til Afganistans eftir sjúkraleyfi. Þeir Steinar Örn Magnússon, og Sverrir Haukur Grönli, sem eru í Íslensku friðargæslunni í Afganistan, og særðust í sprengjuárásinni í Kabúl, voru útskrifaðir af sjúkrahúsi í morgun. Félagi þeirra, Stefán Gunnarsson, mun dvelja áfram á sjúkrahúsi í Kabúl, líklega þangað til á miðvikudag, en hann hlaut meðal annars sprengjubrot í fótinn og á neðri hluta líkamans. Þeir hafa hins vegar allir þrír óskað eftir því að yfirgefa Afganistan, að sögn Hallgríms Sigurðssonar, yfirmanns flugvallarins í Kabúl, og fara þeir frá Afganistan á fimmtudag, og koma væntanlega til Íslands frá Osló á föstudag. Hallgrímur segist telja líklegt að mennirnir vilji láta íslenska lækna kíkja á sig, en fyrst og fremst hafi þeir farið heim vegna fjölskyldna sinna, en þó komi til greina að mennirnir fari aftur til Kabúl. Hallgrímur segir árásina setja strik í reikninginn, en hins vegar muni menn halda áfram að vinna sína vinnu og reynt verði að láta þetta ekki hafa of mikil áhrif. Hann segist ekki reikna með að nýjir menn verði fegnir í stað mannanna, enda eigi þeir aðeins mánuð eftir af samningi sínum.