Haglél seinkar Sumarferðum

Seinkun varð á flugi ferðaskrifstofunnar Sumarferða til og frá Alicante á Spáni vegna hagléls á Spáni. Flugvélin sem átti að flytja farþega á milli Spánar og Íslands fékk á sig haglél í fyrradag þannig að lakk á nefi flugvélarinnar flagnaði af. 212 farþegar áttu að fara með sömu vél til Spánar í hádeginu í gær. Að sögn Helga Péturssonar, framkvæmdastjóra Sumarferða, er viðkvæmasti búnaður flugvéla í nefinu og því hafi ekki annað verið hægt en að skoða vélina vandlega. Því hafi þurft að bíða þess að önnur vél og áhöfn kæmu til Spánar til að flytja farþegana heim til Íslands. "Við vissum fyrst að þetta yrði raunin klukkan rúmlega níu í gærmorgun og hófum þá strax að hringja í farþega sem voru á leið frá Íslandi til Spánar til að láta þau vita að fluginu seinkaði töluvert," segir Helgi. Helgi segir að náðst hafi í flesta farþegana og þeir látnir vita að fluginu seinkaði þar til um kvöldmatarleytið í gær. Einhverjir hefðu þó verið komnir til Keflavíkur og var þeim boðið upp á tvær máltíðir í flugstöðinni.