Davíð útskrifaður af gjörgæslu

Davíð Oddsson forsætisráðherra hefur verið útskrifaður af gjörgæsludeild og er líðan hans sögð góð. Að missa skjaldkirtilinn hefur lítil áhrif á líf fólks, segir sérfræðingur í efnaskiptum. Sem kunnugt er gekkst forsætisráðherra undir aðra aðgerð í sjúkdómslegu sinni í fyrradag þar sem skjaldkirtill hans var fjarlægður vegna illkynja meins. Samkvæmt yfirlýsingu frá forsætisráðuneytinu í dag er Davíð nú kominn á legudeild á Landspítalnum, það er, af gjörgæsludeild. Þar segir einnig að líðan forsætisráðherrans sé góð og hann taki eðlilegum framförum eftir aðgerðina að sögn lækna. Skjaldkirtillinn stjórnar hormónaframleiðslu líkamans og efnaskiptum. Ef hormónaframleiðslan minnkar þyngist fólk gjarnan og fitnar. Sé skjaldkirtillinn fjarlægður, eins og gert var í tilfelli forsætisráðherra, hefur það lítil áhrif á líf fólks í framhaldinu að sögn sérfræðings sem Stöð 2 ræddi við. Fólk þarf að vísu að vera á lyfjum eftir það, thyroxíni, en það er hreint hormón sem kemur þá alfarið í stað thyroxínframleiðslu skjaldkirtilsins. Vel þarf þó að fylgjast með sjúklingum í kjölfarið, einkum fyrst. Forsætisráðherra var lagður inn á sjúkrahús 21. júlí vegna gallblöðrubólgu en við rannsókn kom í ljós staðbundið illkynja æxli í hægra nýra og var nýrað fjarlægt ásamt gallblöðrunni.