Nýnemum án stúdentsprófs fækkar

Rektor Háskólans á Akureyri segir að skólanum hafi verið gert skylt að fækka nýnemum sem fá inngöngu í skólann án stúdentsprófs. Á árunum 2002 og 2003 voru 36% nýnema metnir inn á grundvelli þroska og þekkingar en líklega verður þetta hlutfall undir 20% í haust. Eins og kunnugt er mun Háskóli Íslands ekki taka inn neina nýnema í haust sem ekki hafa stúdentspróf og gildir þá einu hve mikla reynslu og þekkingu þeir hafa. Nemendum sem veitt er innganga í Háskóla Íslands án stúdentsprófs hefur fækkað verulega á síðastliðnum árum og nú er svo komið að engum slíkum nemendum verður hleypt inn í skólann í haust sökum fjárskorts. Það kemur því óneitanlega á óvart að í fyrra voru 36 prósent allra nýnema sem teknir voru inn í Háskólann á Akureyri án stúdentsprófs. Þorsteinn Gunnarsson, rektor skólans, segir þetta hlutfall vera á hraðri niðurleið og að það verði komið niður fyrir 20 prósent strax í haust. Skólinn hafi viljað gefa nemendum tækifæri til háskólagöngu, sérstaklega í tengslum við fjarnám, en fjárveitingar til Háskólans á Akureyri leyfi ekki lengur slíkan fjölda nýnema. Þorsteinn segir hins vegar ekki algjörlega hafa verið tekið fyrir þetta líkt og í Háskóla Íslands.  Hægt er að hlusta á viðtal við Þorstein Gunnarsson úr hádegisfréttum Bylgjunnar með því að smella á hlekkinn hér að neðan.