Varnarliðið greiðir launahækkanir

Starfsmannahald varnarliðsins á Keflavíkurflugvelli hefur fengið heimild til að greiða starfsfólki sínu launahækkanir sem voru innifaldar í kjarasamningum frá árinu 2000 samkvæmt heimildum Víkurfrétta. Þar verða greiddar upp hækkanir frá marsmánuði og launaskrið frá nóvember síðastliðnum. Mikil ólga var í starfsfólki vegna þessa máls og voru tugir málsókna í undirbúningi á hendur varnarliðinu vegna meintra vanefnda. Kristján Gunnarsson, formaður verkalýðsfélags Keflavíkur, segist í samtali við Víkurfréttir vera mjög ánægður með að málið skuli vera í höfn. „Með þessu er miklu fargi af mönnum létt. Við vorum að vinna á fullu í væntanlegum málsóknum og hefðum lagt fram stefnur í næstu viku ef ekkert hefði gerst.“ Kristján bætti því við að þó standi enn eftir sautján stefnur vegna símenntunarálags og annarra launahækkana starfsmanna sem hafa viðmiðanir við aðra samninga.