Bílabrennuvargurinn ófundinn

Brennuvargur sem kveikti í fjórum bílum í Vesturbænum í fyrrinótt er enn ófundinn. Finnist hann ekki er hætt við því að einhverjir bílaeigendanna verði fyrir verulegu fjárhagslegu tjóni. Lögregla hefur enn engar haldbærar vísbendingar til að byggja á og bendir því fólki á að hafa samband geti það gefið upplýsingar sem gætu komið að gagni. Töluvert tjón varð á eignum og eru bílarnir fjórir sem brunnu taldir gjörónýtir. Tjón sem þessi eru einungis bótaskyld ef bílarnir eru tryggðir með kaskó-tryggingu og því verða þeir bílaeigendanna sem ekki hafa slíka tryggingu fyrir verulegu fjárhagslegu tjóni ef brennuvargurinn næst ekki. Ennfremur er hætt við því að tjónið verði ekki greitt ef brennuvargurinn er unglingur, sem á litla fjármuni, þar sem þriðji aðili er aldrei bótaskyldur í tilvikum sem þessum og því ekki gengið á foreldra. Þeir sem hafa tryggt bílinn með kaskó þurfa aftur á móti ekki að hafa áhyggjur af því að bílarnir hafi verið ólæstir þar sem það hefur engin áhrif á kaskótrygginguna í þessu tilviki.