Klink vill Guðsmorð

Rokksveitin Klink, sem í eru m.a. Frosti Runólfsson, trommari, kvikmyndagerðarmaður og forsíðugaur Fókus, og Þröstur Johnny bassafantur í Mínus, hefur verið boðið að hita upp fyrir dauðarokksveitina alræmdu Deicide á Evróputúr. Þeir halda styrktartónleika fyrir ferðina í kvöld á Dillon. Það er ekki langt í að túrinn bresti á, hann byrjar næstkomandi miðvikudag. Klink mun ferðast með Deicide um Danmörku, Þýskaland, Belgíu, Sviss, Svíþjóð og Spán. Deicide kom upp á yfirborðið þegar dauðarokkið var upp á sitt besta og varð fljótt ein alræmdasta sveitin. Þar skipti sköpum söngvarinn Glen Benton, sem m.a. er þekktur fyrir að vera með brenndan öfugan kross á ennið á sér. Meðlimir Klink eru skiljanlega í skýjunum. Hljómsveitin er nýbyrjuð að gæla við það að koma saman aftur og hefur aldrei spilað utan landsteinana þegar þetta tækifæri dettur upp í hendurnar á þeim. Þeir hvetja þess vegna alla að mæta á söfnunartónleikana sína, sem verða á Dillon í kvöld. Þar ætla einnig hljómsveitirnar Dogdaze og Brain Police að spila.