Úr þrælakistu í dj-djobb á Hlemmi

Fókus fylgir DV í dag með fréttir úr skemmtana-, bíó- og tónlistarheimum. Meðal þess sem um er fjallað er nýr staður, sem býður ótakmarkað magn af bjór fyrir 2000 eða 1000 kall og hljómsveitina Aminu sem er gift Sigur Rós og loksins að gefa út plötu. Forsíðuna prýðir Rósa Spotlight Guðmundsdóttir, sem er að setja upp söngleik með Ruth Reginalds í aðalhlutverki. Þá er einnig tekið viðtal við plötusnúðinn Mana Raknarong, sem er karókístjóri Kaffisetursins: Á Laugaveginum, rétt fyrir neðan Hlemm, leynist veitinga- og skemmtistaðurinn Kaffisetrið. Það sem fæstir vita er að um helgar fær staðurinn endurnýjun lífdaga þegar plötusnúðurinn Mana Raknarong sest í búrið sitt. Hann keyrir karókígræjur alla föstudaga og spilar tælenska stuðtónlist á laugardögum. Fókus fór á Kaffisetrið og tékkaði á hinum brosmilda Mana, sem er ekki allur þar sem hann er séður. "Ég elska að vera plötusnúður og fólkið sem kemur að hlusta á mig. Ég elska allar græjurnar og ég elska sætu stelpurnar sem koma hingað til að drekka og dansa," segir Mana Raknarong. Mana er plötusnúður og karókístjóri á Kaffisetrinu, sem er staðsett rétt fyrir neðan Hlemm. Býr til playlista heima Kaffisetrið er fjölskylduveitingastaður. Síðastliðinn þriðjudag hélt Raknarong-fjölskyldan upp á tveggja ára afmæli hans. Mana segir hann vinsælan. "Þetta er eini staðurinn í Reykjavík með tælenska tónlist og diskó. Við ætlum að breyta nafninu núna um áramótin. Vitum ekki alveg í hvað ... eitthvað Thai." Systir hans Patcharee rekur staðinn ásamt eiginmanni sínum en fjölskyldan, sem telur um fimmtán manns, hjálpar öll til. Mana er hæstánægður með hlutverk sitt sem plötusnúður og tekur það alvarlega. Liggur yfir forriti sem hann kallar Program DJ og sankar að sér lögum. Segist vera með yfir tuttugu þúsund lög í tölvunni, flest tælensk. Á föstudögum er hann harður í karókístjórninni: "Pantið lög! Pantið lög!" Á laugardögum fær hann hinsvegar að njóta sín með tónlistarvali og prófar playlistana sem hann hefur áður útbúið. "Fólk er alltaf að biðja um óskalög. Ég hlusta ekkert mikið á það. Ég kaupi tónlistina mest frá Tælandi. Hún fæst ekki í Skífunni," segir hann og hlær. Afganginn af viðtalinu er að finna í Fókus, sem fylgir DV í dag. Þar segir Mana einnig frá því þegar hann vann í þrælakistu fyrir Reebok, kókaíni og kannabis á Tælandi, rasisma Íslendinga og því að hann hefur ekki hugmynd um hver Davíð Oddson er, þrátt fyrir að hafa búið á Íslandi í fimm ár.