Enn óvíst með framsal

Ekki er enn vitað hvort orðið verður við framsalsbeiðni íslenskra stjórnvalda vegna rannsóknar á einu umfangsmesta fíkniefnamáli síðari ára. Þrjár stórar sendingar fíkniefna komu frá Hollandi, tvær með Dettifossi og ein í pósti. Tveir af sex Íslendingum sem sitja í gæsluvarðhaldi eru í Hollandi, óvíst er hvort annar þeirra tengist málinu og því hefur aðeins verið farið fram á að annar þeirra verði framseldur. Ásgeir Karlsson, yfirmaður fíkniefnadeildarinnar í Reykjavík, segir ekkert nýtt vera að frétta af rannsókninni en hún sé í fullum gangi.