Brennisteinslyktin liðin hjá

Brennisteinslyktin sem fannst í Vestmannaeyjum í morgun er liðin hjá en margir Eyjamenn hafa fundið fnykinn á morgungöngunni í morgun. Lyktin kom úr vesturátt að sögn Gísla Óskarssonar, fréttaritara í Vestmannaeyjum, en hann segir það óvenjulegt að finna brennisteinslykt úr vesturátt því hún komi yfirleitt frá jöklunum þegar það er austanátt. Veðurfræðingur á veðurstofunni hafði enga skýringu á þessari lykt á takteinum en taldi ólíklegt að hún tengdist eldvirkninni á Reykjaneshrygg, sem var þar í gærkvöldi og í nótt, þar sem síðasta skjálftans í þessari hrinu hefði orðið vart laust eftir klukkan eitt í nótt. Sá snarpasti mældist 3,3 stig á Richter. Hægt er að hlusta á viðtal við Gísla Óskarsson frá því klukkan tíu í morgun, þegar brennisteinslyktin var enn til staðar, með því að smella á hlekkinn hér að neðan.