Stórfyrirtæki siðblind segir Bart

Stórfyrirtækið er með sömu eiginleika og siðblindingi segja höfundar margverðlaunaðu heimildamyndarinnar The Corporation. Í myndinni líta þeir á fyrirbærið stórfyrirtæki og áhrif þess á menn og málefni. Stórfyrirtækið, eða The Corporation sýnir fyrirbærið stórfyrirtæki í nýju ljósi, sem áhrifavald í lífi einstaklinga, líkt og til dæmis kaþólska kirkjan, kommúnistaflokkurinn eða kóngar hafa verið og eru enn á sumum stöðum. Framleiðandi myndarinnar, sem heitir Bart Simpson, segir stórfyrirtækið tákn frjálshyggju og hnattvæðingar og með því að skoða stórfyrirtæki, sem séu aðal tákn hnattvæðingar, sé vonast til þess að sjá hvaða áhrif hún hefur. Hann segist ekki horfa svörtum augum til framtíðarinnar, en hins vegar sé ýmislegt harðskeytt sem komi fram í myndinni. Til dæmis lagalegar smugur, sem valdi því að ástandið sé eins og það er. Á endanum sjái fólk þó möguleikana, því að í myndinni séu viðtöl við framkvæmdastjóra, rithöfunda, aðgerðarsinna og fleira fólk sem bjóði upp á aðra valkosti. The Corporation verður sýnd í tengslum við Nordisk Panorama kvikmyndaveisluna sem hefst á morgun. Hún telst í flokki spennandi heimildamynda og ætlar Bart að svara spurningum áhorfenda á sýningunni á sunnudag.