Burðarás sameinast Kaldbaki

Burðarás stefnir að því að stórauka fjárfestingar utan landsteinanna eftir sameiningu við fjárfestingarfélagið Kaldbak í dag. Helstu forkólfar Kaldbaks eru Samherji og Baugur, en Landsbankinn og Björgólfsfeðgar eru helstu eigendur Burðaráss.  Fulltrúar Samherja, Burðaráss og Baugs, skrifuðu undir samninga í húsakynnum Baugs síðdegis í dag. Verið er að leggja Kalbak niður og rennur hann nú inn í Burðarás. Markmiðið er að búa til eina sterka heild til fjárfestinga erlendis. Kea, Kaupfélag Eyfirðinga var í gær stórhluthafi í Kaldbaki, en hinir kjölfestueigendurnir voru Baugur og Samherji. Í morgun keypti Samson Holding, eignarhaldsfélag í eigu Björgólfsfeðga hlutafé KEA í Kaldbaki. Nú undir kvöld voru nærri 77% hlutafjár Kaldbaks komin í hendur Burðaráss, sem greiddi fyrir með hlutabréfum í sameinuðu félagi. Öðrum hluthöfum Kaldbaks verður boðið sama verð og stærstu eigendunum á hluthafafundi á næstunni. Lokað var fyrir viðskipti Kaldbaks, Samherja og Burðarás í Kauphöll Íslands í morgun.  Friðrik Jóhannsson, forstjóri Burðaráss, segir að til verði félag sem verður 25% stærra en Burðarás sé í dag og markaðsvermætið verði um 80 milljarðar króna og því verði slagkrafturinn meiri til þátttöku í stærri verkefnum erlendis. Hann segir að alltaf sé verið að skoða verkefni erlendis, þar sem sjónir manna beinist einkum að verkefnum á sviði fjármálaþjónustu, tækni og fjarskipta. Þó séu allir möguleikar opnir. Friðrik segir ferlið hafa tekið heldur lengri tíma en reiknað hafi verið með.